الديار

ديار كنت في الماضي انجول عليهن .. ذهبن افكاري ما اقدرت انجيهن

ديار بهلهن .. ديار كنت ما نطرب الا لعللهن
اليوم كادني يا صاحبي نوصلهن .. اشيانن وطير  البوم ساكن فيهن
مصايب الدنيا و الزمان ذبلهن .. جارن عليهن غيّبن ماضيهن

ايتمن خوالي موش متخيلهن .. اللي قبل ما من اللي نزل طرحيهن

ابقيت نموج .. عليهن اليوم خطاي تمن عوج
ديار عز نزالة اطراف هروج .. اسيادهن وهن من خاطري شاهيهن
عفاهن اشهر ما بين كل فجوج .. بالجود والشهامه كلها تطريهن
يجيهن الضايف فوج يعقب فوج .. ياخذ اقداره والشكيره فيهن
اليوم خلوهن خلا العقل ايروج .. مسوته ايدندن كل يوم عليهن

ديار العفه .. عليهن الخاطر صايباته هفه
ديار عز كسابة طوال شعفه .. تم العجاج  اليوم متقفيهن
روادهن عليهن في البساط تحفا .. مرود لهن مرباع ومزهيهن
اسيادهن تقول الا حليب امصفا .. انياهم خذن ع العز من باريهن
اليوم سوتهن حتي الفتيل اطفا .. وقابس النار اليوم متخطيهن
بعيد خاطري عنهن وجاته خفه .. غافي ولكن ما نهار انسيهن



صلاح الرشيد

بالك خيال تكون

بالك خيال تكون .. " غادة " خواطر خطهن مجنون .. عليش تنشدو

بالك تكون " احلام " .. شاعر كتبهن في اوقات منام
" ليلي " وفيها سايده الظلام .. ماهي " هناء " ولا شابها السكون
نين جاب " غادة " في الحديث " إلهام " .. لشاعر بنظم القافية مفتون
وعنده مقاصد خلفها و " مرام " .. مونيه " سليمة " في خلاص ديون

بالك خيال تكون !!!!!!

بالك تكون " عبير " .. " شذى " فاح من " وردة " لها تأثير
جبر " طيف " شاعر في الاوهام يطير .. " ربيعه " ذبل ماعاد قابل عون
" حواء " عرف عنها اشياء كثير .. " حِكمه " لقي من تجربة شمشون
" صغيرة " احلامه وكايده المسير .. " دنيا " " غريبه " وطبعها بلهون
موش " سالمه " م الهم والتكدير .. كل يوم في الظاهر اتطل بلون
خلاصة كلامه قال في الاخير .. " غادة " حقيقة حلم به مرهون

غرورة الدنيا

غرورة الدنيا عندها تبديله .. اللي توالفه مدة عليك يهون

والدهر كيف الريح عنده ميله .. ذَرّي معاه ان كان قابل عون

ان كان موش قابل ما تظل سبيله .. موش دوم في طبعه ايجي بلهون

رزق البنادم موش ناقص كيله .. كريم ربنا ما ينقصه ماعون

سبحانه علينا صاحب التفضيله .. اللي يقول له للشئ كون ايكون

ما معاه تنفع شيطنه لا حيله .. عالم اللي ظاهر وفي المكنون

وفي العمر ما تبقي الا الاصيله .. وتريح من تبقي عليها دون

غايه العاقل ما يظل دليله  .. وراء فكر هشّ بعاطفه مرهون

وما يكون  ديمه في الطريق خليلة .. شيطان ربي خالقه ملعون

واتصير لخيوطه لخطبه وتخبيله.. م اللي يجرنه برمش عيون

من قبل يادم هن سبب تنزيله .. بات في الوطا بعد الزها مركون

و ضحكة وحيله من افكار دليله .. تهاوت امجاد وغطرسة شمشون

واللي من الغاية بررو الوسيله .. حراب في القفا وفي الوجه ضحك سنون

هذيم هم اللي مالك بهم تأصيله ..  ولالك معاهم خلط لا فرتون

كلام جبت لك ما يلزمك تحليله .. واضح امنقي  بالعسل مدهون

غادة

غادة حلم منه موش واعي
غادة خمر نسكر بيه ديمه
غادة طب يبري لي وجاعي
غادة حق من بعد الظليمه
غادة كيل واحل فيه صاعي
غادة حمل ما نقدر انقيمه
غادي ضي فغياب الشماعي
غادة ليل نبكي من جحيمه
غادة حزن في لحظه وداعي
وغاده فرح في ساعه سقيمه
غادة وحش لاوي لي ذراعي
غادة نصر من بعد الهزيمه
غادة نغم يطرب في اسماعي
غادة ورد جاذبني نسيمه
غادة عطر قاعد في صباعي
غادة  طل عقباته الغيمه
غادة عمر يشكي من ضياعي
غادة  وقت نشكي لمن ضيمه ؟؟؟؟

 

 

الناس كلهم يسكرو بالنبيد .. وانا ما نريد .. الا انتي مع الشعر كيفي الوحيد

الناس كلهم يسكرو بالكحول .. وانا لو نطول .. خيالك ، 80 قدعه نقول

نجيب شعر ما قبل جابو فحول .. جضاري ايحيد .. انكيّف بهن راس طبعه عنيد

علي امهلي ما معاك نبقي عجول .. وعندي رصيد .. من القول ما يتم ديمه يزيد

في كل شطرة فوصفك انجول .. حرام ما انعيد .. كلامي عليك سمح بوعه بعيد

وان ماهو عليك ما نسميه قول .. ونظمه نجيد .. انتي العجز والصدر وانتي القصيد

انتي إلهام يلهم اصحاب العقول .. ومكسب اكيد .. اللي قولهم قول ديمه رشيد

الناس كلهم يسكرو بالعنب .. وني ما نحب .. الا انتي وشعري لجرحي الطب

غثيتك اسود من سواد السلب .. وفايت الجيد .. اوصل خصر م الزين وصفه فريد

وخصله مع كل نسمه اتهب .. ترجع بليد .. علي خد لونه بلون الجليد

عيونك مهاليع فيا اتشب .. و جوفي اتقيد .. اتقول نار شعوطت في حصيد

شفايفك لهن طعم كيف الرطب .. املقط جديد .. ولونهن علي لون روس الوقيد

جمالك نهب لب عقلي سلب .. وعادته ايكيد .. وكدتي اللي قبل ناوي الصيد

جميع جنس حواء فجنبك حطب .. جواري عبيد .. لحظرة جنابك ايفزو لهيد

في القلب تذكار صوبك نصب .. وسرى في الوريد .. يريده علي طول عمره وحيد


 

صلاح الرشيد

راس الحاجة

راس حاجتي طاعة الله وصِيتي .. وعزة النفس اتعينني ع القل
لو نموت ما يخش الحرام لبيتي .. ولو كان راس المال راس بصل
وديمة نظيفه ع الغوالي نيتي .. وفي كل مطرح جيت عندي هل
حتي ان كانهو قاطع الله قسميتي .. في صوب م العازة رجاه اكمل
وصار الخطا منهم وجاء ناحيتي .. ومني خطا مسّع اعزاز اوصل
مازال م الطيبة ومن حنيتي .. علي ماو صاير ما قدرت انعل
ودير العفانه تمنعه بيتيتي .. وكل حد عن نيته الله ايقل
قادر الله عارف حلول قضيتي .. يخضار عود من جور الزمان ذبل
ونا نشكره ديمه علي عافيتي .. واللي صار نعتبرة زنين نحل

صلاح الرشيد

2012-9-2

اخطور خاطرك خطر علي جضاري .. وجبّد سهاري من بنات افكاري 

خطر خطرهن .. سهاري وما ودي انني نذكرهن 
موش خاطرة ما زلت متذكرهن .. خواطر خطيرة بردت لي ناري 
له وقت صاحب خاطري دافرهن .. ولهن وقت ما قربن نواحي داري
وما يخطرن مازال نتصورهن .. ما زال حكمي ما تنفذ ساري 
خطرها علي خاطر خطر صورهن .. خواطر قديمة في حروف اشعاري

اخطورك خاطر .. علي خاطري ويمر كيف الخاطر
اخطور خاطرك خطر علي مخاطر .. باينات ما منهن اللي متواري 
وانا اللي نقدر نشيل قناطر .. وانا اللي صاعب علي كساري
وانا اللي بالسيف نصك شاطر .. علي مركبي مصلوب فوق الصاري 
ترا قولي لو كنت حقه شاطر .. كيف هونت بعد الوجيعة ناري ؟؟

صلاح الرشيد

شمس اشرقت والشمس الاخرى غابت .. انتم كبدها و الكبد فيكم ذابت

وحدة شرقت .. والشمس الاخري في غلاكم غرقت

والكبد يا كبدي بنار انحرقت .. طياب ع المهل من نار هجرك طابت

والعين في مطارحكم نظرها سرقت .. ظنونها بتلقاكم ولكن خابت

وكذّب نظرها للمطارح زرقت .. وردت وما منكم بشاير جابت

وذبلت اللي من قبل قالوا ورقت .. واللي قبل سوداء تو قالو شابت

ذابت فيكم .. انتم كبدها وما تذوب غير عليكم

بايعينها وهي بالكفا تشريكم .. علي هجركم ما عن غلاكم تابت

غبتو عليها وكل يوم تجيكم .. موش مأيسه ولا عن الجي اغلابت

انتم روحها وبروحها تفديكم .. يا جذر في وسط الجواجي نابت

صلاح الرشيد

خطا النفس والغربة وموح دياري .. اسباب همّ من همي وماني داري

اسباب مهمه .. وهن همّ من همي اللي نا همه

هميت ما همت معاي الهمه .. تهمهت ما هون علي جضاري

حاولت نوهم من اوهامي تما .. شريط الاوهام انهونه بافكاري

لقيت بير عقلي موش باين جمه .. مليت من خطا نفسي وكثر اعذاري

ومليت من غيبة اسباب اللمة .. ولوّمت لوّامي اللي فصداري

اللي دار ثوب وما نقص في كمه .. مغير نا اللي قاصر علي مشواري

خطاها خاطي .. نفسي وما تخطا حيوط الخاطي

لقيتها خطت حيطي وخيط ارباطي .. تخاطت وحاطت به الحيط الداري

عيطت ما والي لقيه عياطي .. يهون علي نفسي وتبرد ناري

مليت وانا في الاعذار نباطي .. تعذرت وانا ع الخطا متواري

لقيت ذنبها نفسي عليا ساطي .. تشري البايع من حساب الشاري

صلاح الرشيد .. 19 فبراير 2012

ونا نخاف من لوعة غرام جديدة .. وهي تريد يا يوسف اليوم قصيدة

اتريد اغنايا .. ونا نخاف م الماضي يعود معايا

وخوفي معاها تطول السهراية .. وانت عارفه خيك الصوب يكيدة

وعارف مشاكاتي وعارف دايا .. وعارف الدار اللي علي بعيدة

وعارف الصوب ايجيب قطع الوايا .. ما قدرت نلعب بيه ع التكسيدة

ما هوش قعدة كيف لا شوهايا .. ولاهو علي شط البحر تبريدة

ني القدر ديمة دايره مبدايه .. والقدر فيه الصوب موش نقيدة

مامن جلايب واردات ضمايا .. ردن لقن بيري قديم غريدة

عايب مشقق من اجرار سوايا .. قديم الغلا كاين خرابه بيدة

و لقين الراعي ملتهي في نايه .. حزينه الحانه هادية وفريدة

احذاه الجمل بارك عليه حوايه .. طايب علي الشيله وطالق قيدة

علي ثنو جرتهن دموع ملايا .. ردن ضمايا يصهدن من كيدة

عطاشا يردن موش حد الغاية .. حد غايتي درب النجاه نصيدة

وما نريد يجدد معايا دايا .. وما عاد عندي في الغرام عقيدة

ولا عاد يشغلني غرام صبايا .. ولا نريد نسيهف علي تكبيدة

راه الجوف هايب لذعه الكوايا .. والقلب ناضب م الغرام رصيدة

تريد نغني .. عليها وني ماني غناء متمني

له وقت متعكبس عليا جني .. القول كارهه لا يريدني لا نريدة

حتي وين نسخّر انريد انبني .. بيتين نلقي مهناك مفيدة

علي طول نشطبهن يريحن مني .. رياح قش طاير من لقاط حصيدة

ويريح الزها ومعاه يمشي حِني .. واللي قبل غاوي صيدته ما نصيده

نبيه صاحبك يا صاحبي متهني .. عايش حياته في ايام سعيدة

جافيتهن ماني لهن مدني .. وجافيت جر الصوب ومواعيدة

تواريت عنهن ما توارن عني .. في يسحبن بشويش بالتهميدة

تهميدة عيون ان كانهن خزرني .. من جرهن نذبل تقول اوريدة

ونعاود لموالي اللي شاغلني .. اللي في افكاري من ايام عديدة

نشدتك وقت لك يا رفيقي ظني ؟؟ .. تريد الغلا ولا تريد قصيدة ؟؟

صلاح الرشيد

تحية ود يا مصدر إلهامي .. نبيك تكون يا غالي بخير

ارسلت ابيات ومعاهن سلامي .. فــ ليلة بدر تسري لك مسير

بورد الشوق وبعطرك السامي .. بطعم الشهد من منحل القير

بلمسة حن فوق الخد رامي .. بصوت واروع م الصفير

صفير اطوير للموكار ضامي .. عليه ايهف بشواقه يطير

بعدها يجيك يا غالي كلامي  .. لا تغتاض منه لا تحير

ما نفرضش ع الناس اهتمامي .. صاحب هم بهمومي جدير

لو ما كنت في الصف الامامي .. كي الاخير كي قبل الاخير

صلاح الرشيد

هناك ناس تسكن ليبيا فقلوبهم .. وهناك ناس فيها ساكنين وبس
مـــــــن خيرها عبو جميع جيوبهم .. اوقات كربها ما حد فيها حس
وكل حد يعرف عن اسلوب حروبهم .. اللي في الوسع تسمع مغير الحس
وكيف ع المجبر بالسواد ركوبهم .. واليوم كل حد منهم بعيد عفس
اللي ليبيا تسكن فوسط قلوبهم .. جميع شئ غالي ع التراب ارخص
هذيم مالهم والروح هن مكسوبهم .. لو كانهي استحقت شئ ما يندس
هذيم ناس كل الناس ما وقضو بهم .. هذيم ناس لبلادي هناء وونس

صلاح الرشيد

" شن درنالهم " .. نسالو وما رينا عزاز سوالهم .. يا حبيبتي بالله

ما عد لفي مرسولهم .. واحترنا احنا شن اللي درناهولهم
الله والنبي لو كان جو قولولهم .. احني في " العلاوي " بايتين اقبالهم
هم واقفين يهزهزو في طولهم .. وجتنا "الرعشة " من جرار اهمالهم
... هاهو جواب بظرف خلوهولهم .. " غوالي وبس " ومهناك بدالهم

صلاح الرشيد

الو يا هلنا .. غيابكم علينا طال نين شغلنا .. ليش ما تكلمتو

تما طايل .. غيابكم مع طيحة البخت المايل
ايام قبل كانن ما هناك رسايل .. عاذرينكم ماهوش مشكل قلنا
الا تو لو تبو بكل وسايل .. م النت وبنقالكم توصلنا
الا الكاينه لو كان تم تحايل .. عليه الرصيد وما رسايل طلنا


الو يا عيلة .. غيابكم امحير خاطري ودليلة
ومن فقدكم صارت لبختي ميله .. وما عد بلاكم يا عزاز احملنا
ايام قبل بــ الكمشة يجن في الليلة .. رسايل ورنه كان ماراسلنا
الا اليوم نرجو ماسكين البيله .. فعيوننا يشعل الضي حولنا
وان كانه اخطينا يا عزاز القيله .. واقفين نرجو عفوكم يشملنا
ولو كانكم تريدوا ع الغلا تحويله .. كيف قبل رانا ع الغلا مازلنا
وحاصل كلامي والكلام حصيلة .. غيابكم شغلنا والرياف قتلنا

صلاح الرشيد